Intelligänzblatt für Aesch bigott
24.04.2022
s nöie Alte us em ZwanzigÄinezwanzig
3. Dezämber 2021
Ikarus
S Dr Ösi Kanzler ghäit uf d Nuss
är fliegt, är macht dr Ikarus
Die äinti Froog, die blyybt no offe
hed är ächt vorhäär Redbull gsoffe.
.wö
26. Septämber 2021
Sit sellem Sunndig wäis mes gnau
Aesch isch e Kaff, wien andri au!
Wenn me s vor Joore hät gsee choo
hät me z Aesch dr Dubcek gnoo …
Hesch jo gwunne, gar nit gchnabb
jetz sig so guet, zisch ändligg abb …
Aazelle, Gmäinrööt schelle
d Aescher häi dr Dom nid welle!
Iich dräum vo Aesch in spooter Nacht -
bin us däm Albraum gärn verwacht!
Wott me z Aesch die Stütz nid haa
chunnt halt öbber ander draa …
Me will käi Gschängg ha für e Dom -
vill gscheiter wär e Subvention!
Dr Dom uf em Pflanzblätz
... wär für dr Ueli nit lätz.
Är verchauft si Hof, die ganz Bagasch
und baut im Dom e Hanfplantasch.
Goot d Rächnig uff no cha sichs loone
au do drfür gitts Subventioone!
Dä Nochbere tuets sicher gfalle
si Schüür wird grad zur Volley-Halle!
5. Juli 2021
EM
S isch jo klaar mit däm Joachim Löw,
ass die Schwoobe häime göö
und ass d Oranjes müen vom Blatz,
stöört z Aesch nur dr Hunziger Max.
Mais les Bleus, foutus – épuisés
ont perdu contre le FCB!
Schnupf
Juubel-Truubel…
Dr HaEVau vo Baselland
Fyyrt 101 Joor, s weer jo käi Schand.
är wott sägs Chääferfeschtli baue:
Bim Plaane hed en s Gäld scho graue.
Geniaal hed äin e Schnapsidee;
Daas Schema hesch scho männgmool gsee.
Mit Gäärtner gits e Baum-Aktioon:
Bäumlipflanze ghöört zum guete Doon.
Chasch au wääle, was du wottsch;
Machsch nid mit, denn bisch e Dotsch.
Sells brennt denn Mirabelle syy,
Zwätschge, Kirsch oder nur en öpfel-Wy?
Es isch jo schon e digge Hund,
hed äin doo lycht e Hirny-Schwund?
Für soon e Spryssli, digg wien e Männer-Duume,
Muesch fümfhundert Stutz uus dym Säggel ruume!
Daas syg nit vill, denn nääbem Pflanzen inbegriffe
isch am Feschtli graatis äimool sitzend schiffe,
e Kartonbächer Bier (mit Schuum!),
e Klappsitz churz im Schmineeruum,
wenn du dy Chlöpfer bröötle wottsch
und ooni Masggen ässe sottsch.
Die Hundsverlochede chasch soo zaale,
Nur, wäär druff yystygt, lyydet Quaale.
Fazit:
Duesch im äigene Huus loschiere,
chasch bequäm dehäi grilliere
und dii fröie wien e Moore
am Baum – wo d‘ gsetzt hesch scho voor Joore
dr schreeg Voogel
Codewort „Seraphim“
Froogsch dii amme: Wie chunnts soo wyt?
E Bundesroots-Bschluss fascht ooni Stryt?
Mer häi ys gfroggt – und heftig gsuecht
(und männgmool au ganz kräftig gfluecht)
S chaa nit syy, as äini eläi
E Löösig findt, grad s Gääl vom Ei!
Bim Sueche noom e glatte Flieger
Stoosse miir uff unsre Bundeskrieger:
„Tarnchappe-Bomber“ chräit grad d Viola,
hebt iiry Stimm wien e Pirol aa.
Die Uuswaal stoot (fascht) oony Wiiderreed
Und halb Europa luegt nur blööd.
Miir frooge d Amherd ganz verstuunt;
Die git zur Antwort beschtens gluunt:
Diir müest nur in dr Biible lääse
(und nit duur ganz Europa duurekääse).
Döört stoot, wien e Spitze-Flieger uusgsee duet
Unsichtbar, toll, vegaan und chäibe guet:
Seraphim standen ihr gegenüber; ein jeglicher
hatte sechs Flügel. Mit zweien deckten sie
ihr Antlitz, mit zweien deckten sie ihre Füsse,
und mit zweien flogen sie…. (nach Jesaja 6:2)
dr schreeg Voogel
Fluugi
Sächsedrryssg Fluugi chauft dr Bundesroot,
macht öbbe fünf Stügg für Jeede.
Wills rächnerisch soo nid voll uffgoot,
gän si no Äins de Schweede.
Die nämme s Gschänggli danggbaar aa,
düen mit de Finger schnippe.
E Voorlaag müen si dringend haa,
für dä nöiy Gripe.
Schnupf
1. Juni 2021
Me dräit e Muulblätz zum Bikini -
das isch ganz nöi und häisst Trikini
Nümm wie immmer ...
Scho länger haan iich graui Hoor
e Schnätten au, sit e baar Joor.
Und mängmool gspüür i au my Stäi -
han iich z lang gfyyrt mit miir eläi?
Mi dunggts, es syygi nümm wie immer,
s wird jeede Daag e bitzli schlimmer.
Häisst me mi im Gaarte graase
foots mi a bysse in dr Naase.
Es drääne d Auge, s feelt mr d Luft
so vergoot äim jeedi Luscht.
D Vögel pfyffe, wäisch wie schöön
d Lungen au, in hööchschte Döön!
Mi dunggts, es syygi nümm wie immer,
s wird jeede Daag e bitzli schlimmer.
Bräschte
Rieft mi Frau, miir sette goo
duen iich drvoo käi Woort verstoo.
Es isch en Eländ, sapperlott
ii ghöör halt nur no was iich wott.
Mit mym Schätzli, z Nacht im Bett
laufts au nümm soo, wien äs gäärn wett.
Und wenn me wiider chönnt goo danze
so goot au daas nümm, wäägem Ranze!
Mi dunggts, es syygi nümm wie immer,
s wird jeede Daag e bitzli schlimmer.
E Weewee doo, e Boobo döört
soo, wies halt zum Lääbe ghöört.
Henu, s nutzt nüt drgeege z schimpfe
all daas gids - nur chuum vom Impfe!
dr Dalpi
13. Mai 2021
Banndaag 2021
In äim Satz säit me, churz und gchnab,
z Aesch bigott dr Banndaag ab
Dr Mame wird’s drab Angst und Bang
Si wäiss, dr Babbe gspüürt dr Drang.
So dien d Chinder, d Frau, dr Babbe
au daas Joor duur dr Gaarte dabbe.
Me gseet grad wies de Goofe stinggt
wo dr Babbe s groossi Banner schwingt.
Au wenn dr Jüngschti wetti schutte
mues är mitchoo uf die nöii Route:
Dr Hund läbt nümm, dr alti Prinz,
drum gits dä Booge nümm no linggs:
Statt bim Noochbeer bi de Haase
drambte me duur dr änglisch Raase.
D Tochter motzt: Ischs bald verbyy?
Si wett scho in dr Baadi syy.
dörte und nid do im Gaarte
wurdse iire Prinz erwaarte.
Banndag
Dr Babbe säit, jetz höör uuf zwänge,
gang morn in d Baadi, das duet länge.
Chasch dehäi im Gaarte ligge
und äntligg dyynni Hoose fligge.
Au wenn niemer an en glaubt
hed är en äigni Baadi baut.
Wien ärs gleert hed bi de Pfaadi
hed är gschuuffled für sy Baadi.
D Schirm und Stüel cha jeede Maa
die glyche für baar Frangge ha
Lueg, das nöii Gschäft floriert
d Gmäini-Rächnig isch saniert!
D Schirm und Stüel cha jeede Maa
die glyche für baar Frangge ha
Lueg, das nöii Gschäft floriert
d Gmäini-Rächnig isch saniert!
Dangg syner Baadi do im Gaarte
mues är nümm in dr Schlange warte
Jetz bruucht är nümm in d Baadi goo
und niemer luegt sym Ranze noo!
.wö
18. Meerze 2021
d FIS macht Gschyss
D Lara Gut säit zum Berahmi:
„Me mäints nid guet mit uns Albani.“
Dr Odermatt, dä Pischteflitzer,
säit: „Au nid mit den Innerschwyzer.“
Druff mäint dr Waldner vo dr FIS:
„Mached doch nid soon e Gschyss,
das Reglemänt chaasch diskutiere,
aber erscht wenn d Öösi fiere.“
Schnupf
d
Statt Schnee het d Petra Vlhova,
uff äimoll nur no Müll vor draa.
D Lara ziiet ere drum dr Stegger,
jetz häisst sii Petra Sturzenegger.
Schnupf
8. Meerze 2021
Spryyssologie
Reliquie ghööre zum e Dom
Daas wäiss me z Aesch soo guet wie z Rom.
As „iire“ Dom nit chaa vergammle,
Duet d Marianne jetz scho Spryysse sammle.
D Marianne mäint nid ooni Stolz:
„Dä Spryysse stammt vo Thummel-Holz“.
Die Glyymte
D Marianne hed e rächte Maage,
öffentlig iir Päch go z klaage:
Uff dr gschloss’ne Schyyterrasse
sich dä Spryysse go z verbasse!
Wie oft muesch `s de Goofe saage:
Wäär nit folgt, muess d Folge traage
Dy Menu am e Disch go ässe
Chaasch luut Bundesroot vergässe
Will d Gäscht am Booden ässe miesse
Losst dr Wirt döört Spryysse spriesse
Dr schreeg Voogel
Wenn d wottsch wie d Lara Kürvli ryysse,
fangsch bim Drifter schon e Spryysse.
Nääbechöschte
Wäg mym Graatistescht lüttet s Labor aa,
iich häig sicher die falschi Zaanpasta.
My Spöiz verstopfi alli Düüse,
vo iirem Gräät zur Analüüse.
Dää Apparat miess men ersetze,
will au d Schlüüch sich dien zersetze.
S häig käi Wäärt daas Ding no z fligge,
dr Alain wurd mer d Rächnig schigge.
Schnupf
Vo Corona-Teschts - chunnt äim ze Oore,
gääbs au d Methoode Naaseboore
4. Meerze 2021
Kampffluugi
Dr Ueli stiert in Sekchel yyne
und foot denn luuthals afoo gryyne
„Soo lang iich lueg – iich gsee nur s Loch!
S wird als wie gröösser, saag iich doch.“
D Karin Keller mäint druffaabe
„Das Loch isch sicher nid vo Schaabe!“
D Viola frogt dr Parmelin „Waas meinscht Dü?“
„Däär Fond, däär yyst scho lang perdu!“
Dr Ueli dänggt und dänggt und dänggt,
obs am Schluss ächt doch noo längt?
„Wie soll iich denn, Viola-Schatz,
die Fluugi kaufe, liebe Fratz?!“
Kampffluugi
„Müesch halt dyn Gürtel enger schnalle,
denn machsch äu grad e bess’ri Falle!“
Em Ueli chunnt e Gäischtesblitz:
„Warum müend miir au zwäimaal impfe?“
duet är voor sich aane schimpfe.
„Me chönnt dä Räscht an Zaalig gee
für äi Kampfjet – s bruucht jo nit mee!
(Schyynt’s eignet sich au s äint Vakzin
ganz wunderbaar als Fluugbenzin)!
Dr schreeg Voogel
1. Meerze 2021
Verimpft
Will är nur äi äinzigi Impfig miech,
mäint dr Ueli, är syg e zeeche Siech.
Dä hed doch – s isch zum Hüüle -
e diefy Dällen in dr Büüle:
Hed äär dä Virus denn im Huus
gseet er glyy wie über Migros Data uus.
Zeech, mäine d Bäizer, gopferdeggel,
isch dä Ueli numme bim Gäldsäggel.
Weer är zarter, nid soone Ruuche,
könnte d Bäizer iin als Byftegg bruuche.
Astra-Zeneca Doose wott är im Ussland verströie,
ii haa gmäint, dä Ueli wurd jeede Rappe röie.
Dr Ueli als Vakzine-Spreader
isch besser wie als Impfstoff-Shredder!
Klaar, will dä Ueli käi zwäiti Impfig mache,
sunscht macht er au numme halbi Sache.
Sy zwäiti Doosis chönnen alli haa,
mit Uusnaam vo dääre Sommaruga.
Die wott dä Sprutz au gaar nit griege
uus Angscht, zum SVP-Mutant z verbiege.
die Glyymte
Schleyerhaft
Iich wäiss nid, waas me doo bewyyse wott,
Chrischte, Jude, Muslim, häi dr glyychi Gott.
Dä hed am Schluss – quasi üüber Nacht,
em Adam die hoorigi Eva gmacht.
Verbotte hed er nur, sii sells nid vergässe:
Uff käi Fall vo dääne rooten Öpfel z ässe.
Vom Hoor abdegge, hed er gaar nüd gsäit,
jo är hed sich s nid emool üüberläit.
Die Abdeggig hed Äin uff dääre Gloobusrunde,
wien e Huffe Unnöötigs, vill spööter erfunde.
Schnupf
15. Hornig 2021 - Obesträich 2021
Statt de Bäize noche z goo
dien hüt Bänggler online choo
d Bängg hed s RegioTV Plus im Schlosschäller z Aesch bigott ufzäichnet. Danggschön villmoll!
11. Hornig 2021 - Schmutzige Donnschtig 2021
Lara-Faari
D Lara Gut säit zum Behrami:
„Statt Raclette git s nur no Salami.“
Dr Behrami mäint druff, churz und barsch:
„ Dr FC Sion isch eh am Arsch.“
Ob Salami oder Chääs,
S druggt uff d Stimmyg bi däm Värss
D Lara gseet bi Nääbel nüt
und dr FC Sion käiny Lüt
Dr Behrami mäint, äs isch dr Waan,
Salami zmitts im Ramadan.
Noo lieber daas, als Nääbelschwaade
und mit de Schyy im Pflotsch go baade!
Duet d Vlhova d Lara üüberhoole,
hed sii d Medaille sicher gstoole,
oder gwünnt die Esther Ledecka,
isch das doch e halbe Maa,
macht s am Änd die Shifferin,
wachst sii myny Schyy mit Lyym,
hoolt d Sutter aber dr erschti Bryys,
isch daas wirgglig bsuunders fiis.
E käiny hed iir „Kunschtstügg“ gschafft
S häi all fruschtriert uff d Beschtzyt gafft.
Fassduugeli syy halt nid grad s Bescht
wenn me dr Lara noocheprescht.
Dr Schüütteler heds au scho vernoo
und sy Salami grad loo stoo.
Dr Behrami wott drum wie versässe,
statt Salami nur no Goldwürscht frässe.
die Glyymte
Diggi Boscht
Die „Diggi Boscht“ chaasch glatt vergässe,
am „Aetsch-Baetsch“ chaa sich die nie mässe.
Schnupf
Quizfroog
Wie häisst e bekannte griechisch-/französische Aquarell-Mooler?
Alexis Peinture-Eau
Värsli
Vor fufzig Jöörli, wenn me dänggt
häi d Fraue s Stimmrächt duure zwänggt.
Daarff me sy Wunsch hüt uff sy Zeedel schryybe
löie siis wie d Manne mäischtens blyybe.
Iich mäin ‘Jo’ und Du säisch ‘Näi’,
chumm mir blyybe grad dehäi!
S macht sichs z Züri dr Heerr Mörgeli,
Um Basel groossi Söörggeli.
Lueg iich mir das Gschwurbel aa,
mach iich mir Soorggen um dä Maa!
.wö
3. Hornig 2021
Keini Bängg am Glotzofoon ?
Bi vorem Loggdaun früschi Wösch go hoole,
für mi Schnitzelbangg, zum Helge moole.
S wäiss niemer won iich mini Värs due singe,
s cheem am Änd dr Engelbärger zpringe.
.wö
S nützt nüd, wenn als Bänggler jetz duesch schimpfe,
dä Engelbärger hed sich doch scho loo impfe.Schnupf
Schnitzelbänggler sinn uff äimool Kult,
wird Äine chrangg, isch denn dä Lukas tschuld.Schnupf
9. Jänner 2021
Blagetteusgoob 2021
Wie jeedes Joor zo deere Zytt
chumm iich ins Doorff, s isch nid so wyt.
Iich fröi mi druff, iich wott Euch bsueche,
nur nid noonemoll so wyt go sueche.
An dr Heeregass, bim Jura unde,
han iich Euch s letscht Joor doch no gfunde.
Iich ghöör käi Gugge, waas isch loos?
Müüslistill ischs uff dr Strooss!
Syt Diir ächt -zum mi z verschregge -
wiider nöime go verstegge?
E nöii Obfrau hed z Aesch s Comitee.
Sii säit, s meech iire gruusig wee,
sii isch ganz duuch, mag nümmi lache:
Wääge Covid chasch käi Faasnacht mache.
S hilft käi Versicherig uus dääne Quaale
dr Matti Cueni wäiss: s wurd käini zaale.
Um d Faasnacht glyych no halber z rette,
gits äinewääg non e Blagette.
«Wäisch wenn?» selli s Sujet syy,
falls iich s wüssti, weer ii gäärn drbyy.
Uff dr Gmäinkaländer chasch nit goo
s duet mäischtens s Lätze dinne stoo.
Wenn daarff me wiider Faasnacht mache?
Dur d Stroosse zieh und schränze, lache?
Bi däm Kaländerbuff chas käine wüsse,
blogt d Frau Gmäinipreesi nit s schlächt Gwüsse?
Si lauft duurs Fäld mit blutte Füess,
si dräumt: s verdäile d Waggis s Gmües!
Das Gjoomer breechi wirgligg nüt,
drum bruuchs dä Doom, dä hälf de Lüt!
Si well für Aesch nur s Allerbescht,
spööter gääbs e Chääferfescht.
Me chönni Freud ha, zämme lache,
villicht au wiider Faasnacht mache!
Soo, für mii isch s Zytt zum goo
tue denn s neechscht Joor wiider choo
Ändi Hornig sell denn Faasnacht syy,
schryybets alli im Kaländer yy.
Mir wäi denn schränze, Freud ha, lache
und ändligg wiider Faasnacht mache.
Nämmed d Gleeser, schängged yy:
Am beschte schmökt dr Chluuserwyy.
Ich lüpf my Chelch, stooss mit Euch aa:
Mir wäi ändligg wiider Faasnacht haa!
dr Räbgäischt
Sylveschter / Neujoor 2021
Silveschter Bsuech
Ich sitz am Tisch, äin visavyy,
jeede mit me Gleesli Wyy.
Me säit ‘zum Wool’ en erschte Schlugg,
iich blinzle zue, är blinzlet zrugg.
Mi bissts am Oor, iich due mi chratze,
s glyych macht är mit siiner Datze!
Iich gseen, är isch nid guet rasiert,
s hed allem aa e bitz bressiert.
Im Liecht, vo miiner Stuubepfunzle,
gseen iich si Gsicht, s isch voller Runzle.
S fallt miir uff, em Moodel aa,
mien mir dr glyychi Vatter haa.
Är dräit s glyych Hemmli, bini bsoffe?
D Chnöpf vum Chraage blyyben offe.
Är isch wien iich, sitzt visavyy,
und nimmt e negschte Schlugg vum Wyy.
Mach iich Faxe, duen iich lache,
mues är grad alles nooche mache.
Drum wird iich hässig, zimmlig wild ...
s glyych isch mit mim Spiegelbild!
Wäägem Chääferzüüg bin iich dehäi
und fiir esoo mit mir eläi!
Sitz im Fauteuil, lies e Buech,
haa die halbi Wält mit Skype uff Bsuech!
Iich wünsch Euch s Bescht, e guete Staart,
hebs Nöi Joor für Euch nur Guets baraad!
.wö
No warte ?
Duets im Nöie Joor ächt besser goo?
isch denn dr Chääfer nümmi doo?
Iich mäin me sett non e chlyy waarte,
s Nöijoor halt erscht im Summer staarte!
.wö
Ischs dusse chalt as Gott erbaarm’
dr Muulblätz gitt e bitzli waarm
S bring Euch s Nöii Joor nur Glügg und Sääge.
blyybet Gsund, und gniessed s Lääbe.
Au in deene Zyyte doo -
sell Euch s Lache nie vergoo!
Grad duet dr Donald übere schnappe
si Alti isch am Kchoffere pagge!