Zwäiti Wälle

D Alaarmglogge ghöört me scho lang schälle,
mit dr Loggerig cheem die zwäiti Wälle.
Aber hed me bis jetz, usser reagiert,
s Hiirni bewegt und öppis studiert?
S goot doch d Somaruga zur Pharmaindustrie
und säit, wie innovativ die selle syy.
Drbyy hätt d Simonetta, das soziaale Wääse,
dääne vill besser d Levite selle lääse.
Die foorsche jo gaar nit an „normaale“ Sache,
näi, numme döört, wo s groosse Gäld chaasch mache.
Daas isch jo scho rächt, für e Däil vo de Lüt,
nur wenn alli chrangg wäärde, nützt daas nüt.
Drum erwaart ii e Machtwoort vom Bundesroot,
(uns säit er jo au, wo s duure goot):
Daas Maarschedängge isch jetz z Änd
me chaa au zfriide syy mit zää Prozänt.
Ussgfüllt ghöört daas Medi-Gäpp,
drzue bruuchts nit emool en App.

Schnupf

 

Masgge

S gilt käi Masggepflicht im Drämmli,
will äinewääg nit gschwätzt wird – nämmli.
S Moni, dr Joel, au dr Ben und s Sändi,
sii stiere döört inne nummen uff s Handy.

Masggepflicht gits aaber bi dr Swiss,
also iich find daas e fertig Gschyyss,
sälbscht jetz, wo d Masgge wurdisch kriege,
chaasch jo gaar niene aane fliege.

Au im Bus und Zuug läisch d Masggen aa,
will me dr Abstand döört nit halte chaa.
S isch zwoor nit anderscht als im Drämmli,
doch – bruuchsch no dä Kompiuuter, nämmli.

Schnupf

Politiker

Liifere sii dr Bolsonaro yy,
bestätigt daas nur sy Strategie.

D Angela entschäidet sich ganz schnäll,
bi dr Masgge für s Chineese-Modäll.

Dr „häilig“ Sebastian, dä Schnöösel,
spiilt dr Retter vo de Lääderhöösel.

Um dr Trump umme muess d Melania,
e rächt robuschti Psyche haa.

Dr Kim Jong Un isch nit usser Gfächt,
ob s aanehebt wäisch nit rächt.

Dr Viktor Orban füült sich quasi,
jetz als nöie Esterhazy.

Bundesröötene sinn butzt und gsträält,
dääne hed no nie e Gwafföör gfäält.

Worum mien jetz unseri Politiker daage?
S wäär billiger choo, dehäi „Jo“ z saage.
Sogaar d Realschüeler, won e bitz kiffe
häi daas Nooträcht besser begriffe.

Im Boris Johnson isch dä Brexit völlig egaal,
är suecht Pampers noon em Exit uus em Spitaal.

Schnupf

Me dräit e Muulblätz

Syt letschte Meentig isch d Deviise:
Wär „in“ isch, bruucht e nöii Friise.
Doch passed uf und düend Euch schütze     
vor Viire, wo düen umme sprütze.
Me dräit e Masgge, denn syg Rue, 
säit dr Koch, es häigi gnue.
Chaasch se im Migros und im Konsi haa
ich dängg, dä glaubt no sälber draa.
Ich stell dr Wegger, ass iich s nid verbass     
so Masgge bruuch iich, s isch käi Gspass.
Bi am halb Siibni scho vors Konsum grennt;
s lyt dr Alti no im Näscht und pennt.
Um d Schwiigere macht är sich Soorge
drum wett iich für sälli au grad bsoorge.
Ich duen e Stund lang voor em Laade stoo
denn daarf iich äntlig yyne goo.
Gang vo Gschtell ze Gschtell go Masgge sueche,
ghöör hinder miir, wie d Chunde flueche.
Syy si bim Gmies? Syy si bim Wyy?
Nöime müese die doch syy!
Iich suech se doo, iich suech se döört;
s schimpft s Personaal, äs füült sich gstöört.
Won ii froog, wo s denn die Muulblätz git,
häissts z Aesch im Coop: Bin eus halt nit!

.wö

Vo Mitti Meerz bis wyt in Mai
häissts BaschtA! Blyybed jetz dehäi!

Für Huus und Gaarte

Jetz gseesch d Lüt in Waarteschlange
vor dr Landi ummehange.
S isch hööchschti Zyt zum Setzlig setze
drum düen d Fraue iiren Alte hetze:                
S Gaartebet isch scho baraat,
s feelt numme no dr Chopfsalaat,
dä bruuchi, daarfsch en nit vergässe,
suscht häi d Schnägge nüt me z Frässe!

Bring no Schruuben und e Gitter mit
und chlyy Holz, wenn s daas no git.
Noo äimool säägis, due jetz loose:
iich bruuch e Cheefig, styyg in d Hoose!
Speers äntlig yy, suscht mues`s ewägg,
das Vyych macht nur e Huuffe Drägg.
Mi stöörts, wenn iich duur d Stuube lauf;
daas häi miir jetz - vom Hamschterchauf!

.wö

Sisch so schweer dr Abstand z halte
uf em Tandem, mit dr Alte!

Änggelchinder

Zeerscht dien sii dr Kontaggt mit Änggel verbiete,
denn, daarffsch se drugge, aaber nit hiete.
S Brobleem syyge d Eltere, wo d Änggel bringe,
vilicht steggt jo das Corvid in däänen inne.
Die groossi Froog blybt im Ruum stoo,
wie chaasch se drugge, wenn sii nit chönne choo?

Apropos:
Jo, jetz chaan ii s ändlig verzelle,
als Bueb hett mii s Oomi nit drugge welle.

Schnupf