Superstaar

Zeerscht hed dr Alain Berset, als Magistraat,
e zimmlig normaale Bekannthäitsgraad.
Wie voorhäär fümf anderi Sozialischte,
hed är s Gsundhäitswääse wellen uusmischte.
Doch d Chöschte styyge, und zwoor enoorm,
är schyteret klääglich mit syyner Refoorm.
Sy Beliebthäit isch plötzlich nümm vill wäärt,
s üüberhoolt en vo rächts, d Viola Amhärd.

Syt em Frielig hed dä Trend en Änd,
dr Alain dirigiert ganz vehemänt.
Am Schluss heds jeede Bueb begriffe:
Händwäsche gilt - nit nur noon em Schiffe.
Druff aabe schafft är, churz und knapp,
dr Schwyzer Handschlaag völlig ab.
Wie selle jetz d Buure vo Altdorf bis Laufe,
in Zuekumpft no iiry Chüe verchaufe?

Är beäärdigt no, ii due s nit misse,
daas typisch helvetische Dreyfachküsse.
Spöötischtens jetz wird s allne klaar:
Dä Alain isch e Mega-Superstaar!
„Online“ poschtisch – muesch druff waarte,
vo iim sogaar no Autogramm-Chaarte.
Soo het e chläis Vyych üüber Nacht,
uus em Alain ganz e Grosses gmacht

Schnupf

Bruuchsch e Pause vo dim Drache
gang an Blauebärg go blaue mache!

Varia

Wenn alli aaföön schaffe und d Buure höie,
daarff me denn wiider in d Händ yyne spöie?

Noon em Duuremache die ganzi Nacht,
han ii friener au käi zwäiti Wälle gmacht.

Statt sträike, selle d Fraue daas Joor im Schäärme,
wie gwöönlig - äifach fümf Minuute läärme.

Als „Vulnerable“ goots miir immer no schlächt,
iich daarff wiider alles – numme nooni so rächt.

Syt d Lüt nümm uff Lörrach und Weil spaziere,
mues dr Bund halt dä Anggen importiere.

Zum dii jetz infiziere, muesch s dumm aastelle,
z Basel gits e Huffe vo dääne Gselle

Schnupf

Wirdsch positiv teschtet an dr Gränzkontrolle,
muesch ächtsch dä Virus denn verzolle?

Ummen und verbyy?

Bald zellsch im Corona-Land,
die nöie Fäll an äiner Hand.
‘Au ooni Gschrey und Hischteryy,
wäär d Kriise ganz eläi verbyy.’
Mäine so siibegscheyti Lüt
au dr Loggdown syg für nüt.
Sii häiges jo scho immer gschryybe,
me häigi z Bärn nur üüberdryybe.

S isch d Kriise duure, sy isch z Änd
jetz mached voorwäärts sakchermänt!
An dr Demo schreyt die ganzi Sippe:
dä Wurm isch nur e chläini Grippe!

Ich gsees nid yy daas chäibe zwänge
was sell daas gää, wenn alli dränge?
Chaasch hindedryy scho gscheyter sy
doch isch es wirgglig scho verbyy?
Für die dumme Zwänger duen ii hoffe:
Si sinn im Virus nit ins Mässer gloffe.

.wö

Summerferie 2020

Für e Bsiechli by dä Britte ääne,
muesch vierzää Daag in Quarantääne.
Vo Münche bis an Nordseestrand
heds numme Schwooben ummenand.

Wäisch nit wo d wotsch aane goo,
blybsch duur e Summer äifach doo!

S dien sich d Vire, das wäiss Jeede
frey beweege by de Schweede!
Setsch di au desinifiziere loo -
by de Ami wirdsch nit yynegloo.

Wäisch immer nooni rächte wo aane
blyb doch dehäi, he nundefaane!

Falls di Italie wurdi räiize,
gitts Pizza au in öise Bäize.
Dringgsch derzue, z Aesch muess es syy
no zwäi, drey Fläsche Chluuser Wyy. 

Wäisch nit wo d wotsch aane goo,
blybsch duur e Summer äifach doo!

Wenn me Glügg hed, chaa me hoffe,
isch d Aescher Baadi bald scho offe.
Wäisch, d Marianne hed e guete Droot,
zum Koch in Bärn, dä  wäiss scho Root.

Me hoolt sich denn dr Palmestrand,
uff Aesch bigott an Beggirand.
Ganz in Root chunnt d Schwümmbaadwach
läitt ächt dr Dääler d Viire flach?
D Marianne chunnt als Hauptpersoon,
sii gitt d Pamela Anderssoon.

Wäisch nit wo d wotsch aane goo,
blybsch duur e Summer äifach doo!

Als Gondeliere, s isch dr Waan,
singt dr Pizza uff emen alte Kaan
Mit Muulblätz chunnt dr Dalpi zspringe,
de Fraue d Greeme für d Sunne bringe.
Als Äxtra-Service, me schetzts glyy
rybt är die blutte Rüggen yy.

Wenn dä nit wäisch wo aane goo
blybsch duur dr Summer äifach doo.

Villicht gitts no, das miechi Gspass,
für d Aescher Chind dr Feriepass.

.wö