Intelligänzblatt für Aesch bi Gott
AeTschBaeTsch Rootgääber
H.H. us Duggige wott wüsse, ob me d Masgge spööter emool no bruuche chaa:
AeTschBaeTsch:
Jo. äifach Kaffibulver dryy und häiss Wasser drüüber schütte, die Bessere zem Espresso, die billigere zem normaale Kaffi duureloo; bi de chineesische gits e fyyne Muggefugg.
K.D. us Aesch schryybt:
Mir stinggts. Uf em Schwiizer Farpfäärnsee lauft nüt rächts. E Fründ säit, iich sell e nöis Abo abschliesse. Me chönn uus mee als 215 Sänder wääle, was me luege wett und becheem grad noon e nöie Fäärnsee. Loont si daas?
AeTschBaeTsch:
Äigetlig scho, aaber d Programm syy äinewääg nid besser.
K.T us Aesch wott wüsse: Ich ha zwüsche Aesch und Ettige e Güggel überfaare. Jetz erwarte dr Buur dass iich dr Güggel ersetz. Sell iich das mache?
AeTschBaeTsch:
Äigentligg scho, wenn’s d Hiener nit mergge.
L.T. us Pfäffige frogt:
Iich bruuch iire Root. Mir hänn scho alli Stellige uusbrobiert. Wüsse sii no en nöii, wo nit esoo aasträngend isch? Immerhin wird i daas Joor scho sächzgi.
AeTschBaeTsch: Gärn gschee. Für älteri Lüt wie sii empfiilt s BAG d Stellig ‘Rügge an Rügge’.
P.M. us Rynaach wott wüsse:
IIch bi sechzgi und ha schwer Aschtma. Ghöör ich zue de Risikopatiente?
AeTschBaeTsch: Aigentlig scho. Aber mache si sich nüt druss. Asthma in Iirem Alter isch e Gschängg. Jungi Fraue wärdes für Lyydeschaft halte.
U.G. us Oberwil-Lieli frogt:
Was chönne mir gege die ville Gränzgänger mache wo all Daag über d Gränze in d Schwyz chömme?
AeTschBaeTsch: Entwäder nüt, oder alles sälber!