Frooge

Wenn miir wiider Fasnacht döörffe haa,
hesch denn under dr Larven ä Masgen aa?

Wiesoo selle jetz d Chranggekasse styyge,
wenn dr Huusarzt muess dehäime blyybe?

Däätsch s Hiirni vom Trump desinfiziere,
wurd daas „Sondermüll“ generiere?

Böörsen uufe – Böörsen aabe,
worum het s Groosskapitaal käi Schaade?

Daas Corvid nüünzää isch scho schyssig,
wie wird s ächt mit em Äinedrissig?

Dr Gmäinroot schwätzt no üübere Doom,
git s ächt gaar käi Rezession?

Dä Japaner muesch Abstand halte nit leere,
wiesoo dien sii sich denn glyych vermeere?

Sport het schyynts scho immer gholfe,
aber muess ii jetz au no aafoo golfe?

Schupf

Vire-Fyyre

D Erschtauguscht-Fyyr chönnt stattfinde,
uff em Blatz, bi dr Müüli hinde.
Egaal wäär d Feschtreed wurdi halte,
chönntsch bequääm dr Abstand bhalte.

S Oktoberfescht fyyrsch ganz nöi,
bi diir dehäi mit Lööwebräu.
Will s au gaar nit vill duet choschte,
chaasch jo bim Ruedi e CD boschte.

Dr Samichlaus verdient daas Joor käi Loon,
är isch au soon e vulnerabli Persoon.
Aber als Arbetgääber het er richtig tiggt
und syyni Schmutzli in Churzaarbet gschiggt.

Uff s Chrischtchindli mien mer nit verzichte,
daas faart jo jetz scho Sonderschichte.
S döörff in jeedes Huus yyne goo,
s chunnt jo eläi – inkognito.

Schnupf

S „Bier mit Diir“ duet mr stingge,
muesch s jo vor em Spiegel dringge.

Vor Zytte, d Aescher Bäize syy no offe,
hed sich s Mannevolgg am Stammdisch droffe.
Hüt ghöörsch d Aescher Fraue flueche:
Jä, wo mien si iire Maa go sueche?

.wö

Chöschte

Aeschi, Gössi, Martullo – sii zwänge.
Doch worum sell jetz s Gäld nümm länge?
Für dr Waarehandel uff dr ganze Wält,
gnüegt äi Prozänt vom vorhandene Gäld.
Wurd numme dr Stutz s Kriterium syy,
längti dä no lang für die Pandemie.
Wäär gaar nüt mee doo, nit äi Millioon,
verliere miir ändlig d Spekulazioon.
Verschwunde wäär au d Inflazioon,
luegsch nur no, ass er längt – dr Moonedsloon.
Daas wäär aber äidöönig, ghöör ii chlööne,
jetz wäär aber Gläägehäit, sich draa z gwööne.
Denn, saagen au Anderi, die hänn daas studiert,
scho bim Karl Marx häig s nit funggzioniert.
Aber s wäär s Rezäpt, druff duen ii wette,
um unser Klimaa doch no z rette.

Schnupf

E Vatter säit, s isch arg und schytter,
Homeschooling breech sy Bueb nit wytter.
Äntlig merggsch in deere Zytt
ass s nit nummen an de Leerer lytt

.wö

Vill Lüt hänn Schiss um iire Loon
und euse Gmainroot umme Doom

Als Prääsi z Aesch gseen sich scho drey;
Gits ächt wiider Stryt und Gschrey?
S feelt noone Vierte, soo wurds basse
no chönnt me d Waal am Disch uusjassse!

.wö

 

Isch s woor?

In dere Noot, in dere Kriise
wott jeede was är wäiss bewyyse
verzellt au jeedem, wos nit wüsse wett,
waas das würgligg mit dem Covid sett:
S syyg nit us China, me wurd liege,
dä Virus chönn nit soo wyt fliege.
Us Spiez chunnt s vum Armee Laboor
doch au daas isch gaar nit woor.
Alles nur Blöff, är wüss daas gnau,
s goot um d Rettig vo dr AHaVau:
Die Alte sellen alli wägg,
daas syyg dr äinzig woori Zwägg.
Vo dr Venus syyg e Ruumschiff choo
und häig dä Virus aabegloo,
dä Aluhuet wäiss gnau wiesoo!

Lueg s Wätter aa, säit so ne Mogge
syt em Meerze vill z fescht drogge.                         
Das isch käi Zuefall, das isch Plaan,
verzellt är allne in sym Waan.
Im Wald go füürle chasch vergässe,
dr Chlöpfer chalt als Waldfescht frässe.
S goot numme drum in deere Kriise,
eus allne s Fleisch vum Füür z vermiise.
Vo dr Venus syyg e Ruumschiff choo
und häig dr Rääge mit sich gnoo,
nur d Aluhiet, die syy no doo!                                   

In dere Noot, in dere Kriise
wott jeede was är wäiss bewyyse.
Hesch in dr Kriise gaar käi Waal:
Bald lauft alles digitaal.
Statt im Office schaffsch dehäi
äi PeCe längt nümme, me bruucht zwäi:
wott dr Vatter sich im Gschäft yylogge
dien scho d Goofe vor em PeCe hogge.
Du froogsch di, wäm das alles nutzt?
He, d IT-Lüt syy gstreelt und putzt!
Numme drum syygs Ruumschiff choo
und häig dä Virus aabegloo
dä Aluhuet wäiss gnau wiesoo!

Glaubsch das Värssli isch e Säich?
S isch alles Luug und biirewäich?
Settsch di au suscht mit dänggä blooge:
Froog, was isch woor und was isch glooge!

.wö

Die Openair muesch jetz ussloo,
d Künstler dien am Wood-Stogg goo.

Üüs em Wallis

Jetz duet au dä Couchepin no interveniere,
mäint: „Sälber produziere statt importiere.“
Aber d Impfstoff-Firma het är nit rette welle,
wo me für zwanzg Millioone hätt bhalte selle.
Drum saag ii däm Couchepin: „Bisch ä Lööl,
reste à la maison et ferme ta gueule ».

Schnupf

Jetz döörfft iich s Grooschind wiider druggä -
nur nit lüpfe - wäg em Ruggä!

Desinfiziere hälfi, s wär käi Fluech,
meech dr Trump ä Selbschtversuech.