D Bäizer hän rächt: Me chönnt s Aalegge vom ene Muulschutz in dr Bäiz voorschryybe

Wenn denn d Bäizen ändlig offe syy

 

Für Lüt, wo wääred em Bier-Süürpfle wäärt uff Auge-Kontaggt leege…

Für en Erschtbsuech in myym Spunte,
han iich au en alternativi Löösig gfunde:
Iich boor in d Masgge, grad bim Schnöörli,
e winzigs Löchli für ä Röörli.
Dasch viroloogisch ideaal,
nur s Bier schmeggt halt e bitzli schaal.

Schnupf

 

Im Alterszentrum, s isch no gschiggt
wärde jetze Masgge gschtriggt

Vor em Spiegel ...

Vor em Spiegel bini gsässe, luege dryy.
Iich gsee dört drin e Hooraff jä, wär mag das syy?
Isch daas im Spiegel würgligg s Spiegelbild vo mir?
Oder chunnt en Aff vum Zolli grad duur d Yygangsdüür?
Ich bi verschrogge und gsee mii in groosser Gfoor:
Das Vyych doo vor mir het e Huffe langi Hoor.
Vor Schregg ryss iich myys Muul uff und was mues i gsee?
Das Gschöpf rysst d Schnuuren uff wien ii numme no vill mee:
Jä Häilanddonner, jetzt wird's aber würgligg ruuch!
Iich gsee mi scho verschwinde in sym riise Buuch,
weer für immer furt und niemer hättis gsee,
am heiterhelle Voormidaag und wie wenn nüt weer gschee.
Bi gläämt vor Schregg, chaa nit emoole lallle,
ghei in Oonmacht, bi vum Stuel an Booden aabegfalle.
S chunnt my Frau cho z springe mit der Gaartescheer;
sii hilft mer uffstoo, nur bin iich e bitzli z schweer.
Scho gly druff aabe chunnt dr nööchschti schlimmi Schogg:
Iich mach d Augen uff, gsee üüber mir nur iire wytte Rogg.
Esoo goots in Corona Zytte doo bin eus dehäi:
ändlig syy mir bäidi zämme wiider uff de Bäi.
My Frau faart mir duur d Hoor und säit, si syygi froo,
wenn i ändlig wiider döörff zum Coiffeur goo!

Dr Dalpi

(frei no Mani Matter)

Masseuse und Frisööse,
mien jetz alti Chnoote lööse.

Viro-logisch

Amerika gränzt an Mexiko,
drzwüsche duet e Muure stoo,
die duet jetz aber eender nütze,
um alli Mexikaner z schütze.

Masgge machsch am beschte dehäi,
us eme Chöörbli-BH git s scho zwäi.

Wellnessferie in Montafon?
Chrüzfaart um dr ganz Balloon?
Iich saag daas gaar nit wäägem em Giz:
„S isch niene schööner as in dr Schwyz“.

Dä Koch cha rueig stooisch blyybe,
wenn miir dehäim mien ummechyybe.

Wenn s für alli äinisch Masgge gääbe sott,
was mache Kantöön mit Vermummigsverbott?
Oder anderscht gfroogt – ganz banaal:
„Isch d Burka by dääne wiider legaal?“

D Martullo isch Äini vo de Blocher
und iire Maa isch jetz dr „Chocher.“

Dr Banndaag machsch daas Joor eläi,
nimmsch dr Chlöpfer mit – halt vo dehäi.
Iich hool en byym Metzger, Äin vo de düüre
und zien en diräggt ab vo de Stüüre.

„Coiffeure“, wo stööre mit groosser Rööre?
Dangg Masgge duesch die glyy nümm ghööre.

Schnupf

Daafelsilber?

S Chrütter-Dääfi, wo d globaal chasch chaufe,
wird jetz no produziert in Laufe.
Aber was hän miir nit alles hääre gää,
wo Anderi gäärn dien üübernää?
By den Angelsachse isch s Voltaren
und by de Schwoobe s Bepanthen.
D Mepha goot vo Aesch zu den Israeli,
und d IT – usglaagered nach Neudehli.

Zwäi Impfstoff-Buude hän miir au ghaa,
die sinn jetz z Ängland und Amerika.
Hättsch Äini chönne rette, für zwanzg Millioone,
dr Bund het gmäint, s wurd sich nit loone.
Aagnoo, d Impfig wird gfunde bym Trump,
chrääit dä, „America first“ ins Land!
Miir mien denn aastoo, um s Mittel z hoole,
us zwäiter Hand – importiert vo Pole.

Schnupf      
                                            

Lock-up

Wenn dy Frau vom Gwafföör chunnt
Und schwaaflet wien e Zyttigs-Bund
Chasch für zwäi Stund  nüt mee plaane
Am beschten isch: Loos nümmen aane!

„D Prinzässin doo -, dr Herzog döört -
Hesch vom Skandaal denn noonig ghöört? –
Die Prominänz, s isch nid zum saage,
goot sich unfair hart an Chraage!!“

Im Abo losst d Frau d Heftli choo
In alle Faarbe, chaa s nit loo,
sytdäm d Gwaffööse nümme schafft
und numme noo ins Leere gafft.

Doch gly isch dyny Rueh verbyy:
D Gwaffööse ruumt der Salon yy!
D Räägebooge-Präss lyyt gaar nid uf
S isch rächt steril – nümm soone Buff.

Schnäädere duet d Gwafföös  nümme
S goot halt nit guet in dr Masggen inne
Jetz informiert my Frau, was royaal goot
woruff d Gwaffööse prompt uffschloot.

Dr schreeg Vogel