PARL AM ÄND

S isch fascht egaal, wäär s ganz uusgfalle,
daas Dräffe in dr Expo-Halle.
Dr Rösti Albert will zrugg zum „Normaale“,
dr Balthasar Glättli an d Fluugi nüt zaale.
Zämme luegt men, ass d Kitas nit leer uusgöön,
(s wäär zwoor e Sach vo de Kantöön).
Au für d Kultuur hed men Almoose,
addiert, wird noo mee Gäld verbloose.

Bis doo dunggt mii die Sach e Bloog,
denn chunnt sii, die entschäidend Froog:
Döörffe d Firme mit Chuurzaarbet, hütte,
d Dividände daas Joor glyych uusschütte?
D Kommissioon säit „Näi“, sogaar d SVP,
drfüür syy nur vier –  vo dr FDP.
Im Nazionaalroot, non em Mässer wetze,
duet sich s „Näi“ au duuresetze.

Denn isch dr Seniooreroot vom Stöggli draa,
die saage „Jo“! Fascht jeede Maa.
Jetz döörfft ys klaar syy, wurd ii mäine:
Zaalt wird d Chuurzaarbet vo uns Chläine.
Iich dängg, dä Stall müest men uusmischte.
Am Schluss wääl iich no d Soziaalischte,
denn eerlich gsäit, am Beschte vo Alle,
hed miir bis jetz die Badran gfalle.

Schnupf

Käi Schmützli döört, käi Schmützli doo
Em Theiler mues jo schytter goo!
    

Menscheschlange

In Ängland, es isch Traditioon,
ghöört s Schlangestoo zum guete Doon.
E jeede stoot; öb Frau, öb Maa
am Schlangenändi z hinderscht aa.
Iich has dangg Corona gleert,
mäin, es isch nit so vercheert.

Wotsch vum Metzger Fleisch zum Broot
isch s Schlangenändi vor em Good.
Für e Bluemelaade, nääb dr Bangg
wartisch bim Barriere-Rangg.
Bim Schlangestoo, es isch nid s Lätze
chunnt me mit fremde Lüt ins Schwätze.
D Zytt goot wie im Fluug verbyy
 s feelt numme non e Gleesli Wyy.

No zwäi, drey Lüt stöön vor mir aa
Jetz ändllig bin au iich bald draa,
Doch won iich Gwaggli chönnti bestelle
wäiss iich nümm, waas iich ha welle!

Dr Dalpi

Ändsträich

S Desinfektioons-Mittel, sett äinisch alles ände,
chönntsch no zum Fänschter butze verwände.
Doch, wenn miir das Virus ändgültig verdryybe,
was machsch mit all dääne Plexiglaasschyybe?

Schnupf

Duure Drülle

Es säit dr Psycholoog zum Psychiaater:
„Iich halt s nümm uus, daas ganz Theaater.“
Dr Psychiaater mäint: „Loos, s isch esoo,
zu diir han ii au graad welle choo.“
Noon ere Pause, en unändlig lange,
syy sii zämme zum ene Pfarrer gange.

Schnupf

Expärte

Bi de Fäärnseedöggter, döört laufts rund:
Guet vierzig Minute, denn syy alli xund!
Me wurd Covid blitzschnäll Mäischter wäärde
mit deere Top-Expärte-Häärte!

.wö

Konkurs ?

E Konkuurs maagsch jo Niemerdsem gönne,
graad hüt, wo me nüt drfüür wurd chönne.
Nur bi äim Maa, fänd iich s sogaar glatt:
S isch dää Egypter in Andermatt.
Iich hoff, will s doch nit duet passiere,
s däät sich dr Russi distanziere
und däm, wo s Gäld mee zellt als s Lääbe,
äifach Äini wurdi chlääbe.

Schnupf

Home-Office

Im Home-Office chönnt me jo scho lache
wenn d Seggretärin cheem cho Huusbsiech mache!

Im Pyjama an e Sitzig choo ..
im Homeoffice chaa das scho goo.

Masch Home-Office und bisch vum Fach  
no bisch am Oobe wiider wach!

.wö 

S hebt d Goofe nüt me uff em Stuel
si chönnen ändligg zrugg in d Schuel.

Wäsched immer alli d Händ
Corona isch no lang nit z’Änd