Intelligänzblatt für Aesch bigott
Corona Wuche 10
S isch dr Banndaag, wäisch wie myys,
das Joor nur Familie-wyys.
Am Moorge frie, sisch nid zum Lache,
duet dr Vatter d Daagwach mache:
Statt Drumpeete nimmt är s Xylophoon,
das isch jo fascht dr glyychi Doon.
«Punkt Nüüni stöön miir, jetz isch Rue
voor dr Huusdüür in de schweere Schue!
Für jeede gits e schööne Huet,
so goots im Gaarte-Bann noo, das isch guet.
Iich bi geschter äxtra d Stäi go glänze
so gseet dr Noochber syny Gränze.»
Bald dien Chinder, d Frau, dr Babbe
duur dr äige Gaarte dabbe.
Bim Pflanzblätz ääne stöön si yy,
s Familiebanner isch drbyy,
das dräit dr Jüngschti, goot voraa,
die andre chömme hinde draa.
Im Hundshuus ääne schlooft dr Prinz.
s goot ummen Egge, schaarf no linggs,
denn graad us, bald rümpft me d Naase:
Me schmöggt em Noochber syny Haase.
Bim Gaartedüürli nääb de Roose
gschpüürt dr Jüngschti syny Bloose.
Für e Maa am Banndaag isch s normaal,
me hilft sich schnäll uus deere Quaal.
Dr Noochber hed d Wält nümm begriffe,
wo dä Bursch duet an sy Sorbus schiffe.
D Schweschter goot bim nööchschten Egge
sich hinderem Mischtstogg go verstegge.
Duet ächt im Gaarten äine huuse,
wo mit iire wetti schmuuse?
Am Banndaag, döört im Dannewald
weer sicher öpper won‘re gfallt.
S wott d Mueter häi, es häig käi Zwägg,
si dramp ständig in e Chatzedrägg.
Nüt isch, säit dr Alt, mir lääbe gsund;
mir laufen erscht e viertel Stund.
Drum goots wytter Schritt für Schritt
und alli zämme chömme mit.
Si stöön bim Pflanzblätz, mergge glyy
- doo simmer jo graad voorig gsii -
dr äige Gaarte isch vill z chlyy.
Suechsch Nöis, wotsch leere jeede Daag,
lueg überen äigene Gaartehaag!
.wö
An ächte Bänggler, nid e Buur,
gwünnt z Aesch dr Bryys für sy Kultur.
S stoot in dr Zyttig und im Internet
ass jeede wäiss, wos wüsse sött.
Jetz kenne d Ami, d Russe, d Hunne
euse Schnupf, äär het jo gwunne.
Vo dr ganze Wält dien Glüggwünsch choo
s wäi alli z Aesch an s Bryysfescht goo.
Uus Ameri- und uus Kanadaa
au vum Macron nääbedraa
uus Ängland d Queen, die alti Lyyse,
denn dr Trump, dasch zwoor e Myyse,
uus dr Türkey dr Erdogaan,
dr Putin au, das isch dr Waan!
s weeren alli gäärn am Fescht drbyy,
doch dangg Corona chaas nid syy.
Uff dr ganze Wält, hed me nen gäärn
drum gits Gschängg vo ville Fään.
Dr Sääge schiggt dr Baabscht uus Room,
au dr Benediggt, dä alti Gloon.
E Fläädermuus schiggt e Chinees,
die uus em Schächedaal e Bolle Chees.
Au d Marianne z Aesch loot si nid lumpe,
duet vor Fröid in Himmel gumpe;
d Corona-Juni-Landsgmäin häig sii welle,
ass dr Schnupf denn chönn drvoo verzelle!
.wö
Dr Bundesroot isch gar nid stur
zaalt neuerdings au an d’Kultur
drum het d’Jury glyy uusegfunde
es geeb Aescher in deere Runde
wo scho lang druf waarte
si cheeme draa in deere Spaarte
Bim Duurstich laufts doch rund
und au dr Dom für das, weer doch e Grund
dr See isch au nümm wyt ewägg
au dä erfülli doch sy Zwägg
für dä Pryys hed d’Jury üüberläit
er würd zum Abschluss dr Mariann verleiht
Wääge Corona stellt men aber fescht
zu soomene Aalass bruuchts jo Gescht.
Drum macht me gschnäll e Hooselupf
und üübergit, verdient, dä Pryys em Schnupf
dr Graureiher
D Lieschtler Fraue weere no so froo,
iiri Manne wurde dr Bann abgoo.
Si chönnte sälle Meentig richtig nutze,
miesste nümm um d Mannen ummebutze.
.wö
Uff Augehööchi chaasch gly s Virus gsee
Im Joggeli und im Eglisee
D Hängebagge lambben uuse
und fuusioniere mit em Buuse
Arschbombe daarfsch, es isch zum Lache,
Numme mit em Muulschutz mache
Hueschte döörfsch nit ungeniert;
ins Wasser byysle unfiltriert
Dr Muulschutz ziesch bis üübers Chiini
Dr Räscht verdeggt jo denn s Bikini
Wenn d in dr Birs am Schwümme bisch,
wäisch weenigschtens, ass sii nit suuber isch.
Isch d Aescher Badi nooni offe,
bisch für d Chatz do aabe gloffe.
Dr schreeg Vogel
Bim Bäize-Bsuech goots dr wie in Kentucky,
du stoosch am Yygang wien e Lappi.
Noon em kontrollierte Desinfiziere,
muesch schnuerstraggs zum Disch marschiere.
Nöi isch – duesch dr d Auge ryybe, -
s Zueproschte duur die Plastiggschyybe.
S Ambiente faal, au für mii als Maa,
drfüür han ii wiider emool Pommes ghaa.
Am weenigschte chaasch di bim Gwafföör schütze,
sogaar e zwäifachi Masgge duet nüt nütze.
Geege dr Föön, wo bloosst und all dä Lack,
hilft nit emool my Schnupfduubak.
Doch ins Drämmli leeg iich e Masggen aa
und hoff, ass dä voorne glyy abfaare chaa.
Z Rynach chunnt e Mami mit iirem Bueb,
dr Sprooch noo, sinn syy nit vom Trueb.
S Mami drüllt ständig an iire Zöpf,
dr Chläi segglet umme, druggt alli Chnöpf.
Denn niesst er, s het mr fascht öppis gää,
s näggscht Mool dueni wiider s Auti nää.
Äi Froog isch wüürgglig nooni vom Disch:
Nämmli, wie daas mit den Uuränggel isch?
Vilicht isch s besser, si blybt offe - die Lugge,
sunscht wuurd me die Gööfli emänd no verdrugge.
Noon ere Eewigkäit bin ii wiider in my Knille,
um döört soo richtig dr Duurscht goo stille.
Dinn hogge wie voorhäär die glyyche Lüt,
veränderet het sich sunscht au nüt.
Mit Abstand halte nimmt mes nit soo gnau,
d Gäscht schwätze noo wie voor nit schlau.
Doch öppis isch nöi, fascht sensazionell,
uff em Hüüsli het s e Säifi uff em Gstell.
Schnupf
Uff e Summer mag mi gaar nit freue,
wenn d Mäitli uff em Muulblätz cheue.
s feelt s Grinse doo und s Lache döört
zum Glügg gits d Karin, wo me ghöört!
S liggt für daas Joor uff dr Hand
Ferie machsch bin eus im Land.
Joodle, singe jeeden Oobe
vertrybt ys au die letschte Schwoobe
.wö
D Nochber-Liggs und d Aescher-Liggs vum Schnupf liist men immer wiider gärn. Mir hänn in alte Fasnachts Zyttige (AeTschBaeTsch) gschneust.
Dä passt doch in d Zytte vo Home Office:
Do setzt doch ä Maa in Binnige
Sinere Frau so Bedingige
Jede Dag bloche
Dreymol warm choche
Das schloot halt bis z Obe uf d Stimmige
Schnupf 2009
oder dä:
Ä Huusmaa blöfft in Therwil
Är verfolgi än ergizigs Zyyl
In churzer Zyt hösch
Ä blietewyssi Wösch
Und das ganz ooni Persil
Schnupf 2008