Mit 66 Jöörli

                                          (zum Abschied vo dr Marianne)

Jetz loo mii bangsioniere, schmäiss dä Bättel hii,
Gmäinspräsidäntin, bin ii längschtens gsi.

    Ooho, Ooho, Ooho.

Iich hau jetz voll uff d Pauke, und ghey nit in e Loch,
gang jeede Daag go baade, mit em Daniel Koch.

    Ooho, Ooho, Ooho.

Dä Doom und au daas Seeli, duen ii Jüngeren üüberloo,
wott öbber öbbis wüsse, bin ii äifach gaar nümm doo.

    Mit 66 Jöörli, foot my Lääben aa,
    mit 66 Jöörli, gang ii richtig draa,
    mit 66 Jöörli, bin ii voll im Schuss,
    mit 66ziiig, isch no lang noonig Schluss.

Ii chauf miir e Ferrari, gang uff e Nürnburgring,
denn das Tämpo 30, find iich äifach schlimm.

    Ooho, Ooho, Ooho.

Loo mii in Paris frisiere, und chauf in Mailand yy,
bii mit em Bruno Theiler, an jeedem Fescht drbyy.

    Ooho, Ooho, Ooho.

Iich loss die Lüt loo reede, dängg, s isch äifach soo,
d AHV kriegt jeede, iich due si duureloo.

    … Mit 66 Jöörli, foot my Lääben aa,

Ii gang mit myynen Änggel, uff e Hippie-Trip,
nimm die bäide Binggis, uff San Francisco mit.

Und triff ii döört per Zuefall, uff dä Donald Trump,
saag ii däm uff Aescherdütsch, äifach alli Schand.

    Ooho, Ooho, Ooho.

Druff aabe säit my Änggeli, die chläini Valerie,
die uusgflippti Lady, daas isch my Oomi-mii.

… Mit 66 Jöörli, foot my Lääben aa,

… Mit 66 Jöörli, foot my Lääben aa,

Schnupf

 

Kriminal-Tango

                                                    (zum Abschied vom Bruno)

Kriminal-Tango in dr Tavärne,
häisst jetz nöi Gang-Goo, wäg diir Bruno.

In däm groosse Klub vom Gang-Goo
isch dr Bruno nöi drbyy.
Näggschtens bruucht er noon e Fango,
denn das Butze macht en hii.
Z Ooben isch er uff dr Schnuure
und vom Chrampfe no ganz fiecht,
gheyt ins Näscht und isch duure,
d Ursula löscht nur no s Liecht.

Vorbyy isch s mit Tango, in dr Tavärne,
daas chaa no lang goo, käi rooti Ladäärne.
Oobe für Oobe, immer nur s Glyyche,
ganz ooni Spannig, ins Bett yyne schlyyche.

An Früschmäärt chaan är numme churz goo,
will noohäär goot s diräggt ins Miigroo,
au no üübere zum Schaad,
dä hed d Chlöpfer scho baraat.
Im Coop chauft er denn no s Gmües,
hed au jetz scho wundi Füess
und mit total miede Bäi,
schleppt är au no alles häi.

Vorbyy isch s mit Tango, in dr Tavärne,
daas chaa no lang goo, käi rooti Ladäärne.
Oobe für Oobe, nur dinne nit duss,
jä unsere Bruno, het Häxeschuss.


Doch am Sunndig wird uusgschloofe,
s läärme gottsäidangg käi Goofe.
D Ursula het s Zmoorge gmacht,
ass im Bruno s Häärzli lacht
Sii dien denn noon em Apero,
zämmen in e Bäizli goo,
döört chönne si nur aanesitze,
d Chällner dien jo ummeblitze.

Z Oobe git s Tango, bis Theilers dehäi,
s isch alles suuber, käiny soo miede Bäi.
Und zu däm Tango, noon e guets Gleesli Wyy,
denn dää schöön Tango, goot nie vorbyy,
goot nie vorbyy, goot nie vorbyy.

Schnupf

s wird bekchannt gmacht ...

Als Uusrüefer, Bott duet me mi kchenne,
iich wo im Doorff duen umme renne,
verzell wenn Gmäini isch und wo,
me s’Gäld für d’Muusschwänz duet bechoo.
Drnääbe wäiss ich au no z brichte,
uss dem Doorff die nöischte Gschichte:
Was bin eus eso duet goo,
wär wär am Säil duet abeloo.

Wäiss genau wär z Aesch so woont,
und wär gäärn über allne droont.
Iich wäiss doo am beschte Bschäid,
mi bringt kchäine in Verläägehäid.

Bekanntmachig!!

Im ganze Doorff gspürt me dr Chummer,
s letschti Joor im spoote Summer.
S häisst d Marianne geech und zwoor scho glyy,
chaa das wirgglig möögligg syy?
Dr nöi Verwalter hed mir gchlöönt,
är häig si eerscht grad an se gwöönt!
S bräicht au dr René, iire Maa,
wo ab däm Bricht kchäi Fröid duet haa.
S isch umme denn mit sinner Rue,
si häi jetz zämmä ganz vill z due!
Goot d Marianne wirggligg scho in Rentä?
Nit möögligg - s isch e Zyttigsäntä!

Bekanntmachig!!                                           

Hütt häisst me mi uff d Schutti z choo.
Iich sell Euch sääge: Si duet goo!

No sechzää Jöörli ischs so wytt,
au dr Bruno säit: Für mi isch Zytt.
Ooni Marianne well är nümmi blyybe,
är dybbd drum au si Ruggdrittschryybe.
Iich froog mi nur, wenn die dien goo,
cha no öppis bessers nooche choo?

Bekanntmachig!!

So umme hogge, in de Finggä,
foot deene bäide bald a stinggä.
Si chönnte zämme, s wurd no räize,
in dr Chlus uss afoo bäize!
D Locanda wäri schnell bekchannt,
in dr Stadt und uff em Land.


In dr Chuchi häd dr Bruno z due,
d Marianne gäb dr Sämpf drzue!
Cremschnitte gitts und Wyy zum Dringge,
dr Kchonkchurrenz wurds gwaltig stingge.

Bekanntmachig!!

Wenns mit dr Bäiz nit recht wett groote,
chönn d Marianne afoo d Lüt beroote.
Si hed Kchonnegschtions bis uf Bärn,
und au z Lieschtel ganz vill Fään.
Setts z Aesch nit gchlappe mit em Doom
gitts nöimen anderscht aun e Gloon!

Bekanntmachig!!                                           

Dr Bruno säit mit vill Vernumpft,
Iich blyyb drby, iich lueg zur Zumpft!
Villicht goot är, s wurd selli fröie,
ins Schächedaal go hälfe höie.
Dr Oberchnecht, do gitts nüt z lache,
zäigt iim wie me Chees duet mache.
Als Aescher Chees wär denne z haa
was me vum Gmäiniroot verzelle chaa.

Bekanntmachig!!

S dien sich d Gmäinrootsfraue nomoll schmingge,
wänn ihrem Bruno nooche wingge.
So äin wien är gallant, charmant,
suechsch suscht wytt umme in dem Land.

Bekanntmachig!!

So für mich wäärs Zyt zum goo,
für hütte will ich s blyybe loo.
Ich lueg uf d Uur - es isch so wytt,
ab jetze grieg ich Ueberzytt
Salli Marianne, Burno, iich mues goo,
duen Euch ab jetz in Friede loo.
Mi Tschoope denn an Bügel hängge,
Dr Räschte chönnet Dir Euch dängge!

Dr Bott vo Aesch bigott

 

Uuf Aesch Nord wüsst iich e Räim
nur uf Soleil findi käin

Wöschwyb


D’Wyber fiere s’Regimänd,
Aesch isch fescht in Frauehänd.
zum Cyrill meint dr Schille: Digge,
jetzt mien mir dängg leere strigge.

Wöschwyb 2001

 

Bekanntlig schloot d Hollinger Marianne
An dr Gmäini fascht alli in Bann
Numme die Buure
Die chäibe stuure
Die stöön halt äifach nie stramm

Schnupf 2007

s isch hüt schweer en Aescher z syy,
d Rynacher schwätze immer dryy.

Schnupf 2010


D Aescher Gmäin hett s Schlössli gchaufft
wär vo Euch wäiss was do laufft?
Das gyt, do macht me käini Pflänz
für d Mariann d Altersresidänz!

Wöschwyb 2017

D Marianne will d Rääbe bis ins Doorff yyne zie,
so vyll Chluser suffe d Aescher nie.

Schnupf 2018